Como algún sabedes, estamos a promover un proxecto de colaboración con Mozilla a medio prazo que deberá implicar a moita xente para crear a primeira base de datos libre de rexistro de voces en lingua galega, fundamental para o desenvolvemento e aplicación en galego das tecnoloxías que permiten a existencia dos conversores de texto a voz, os asistentes dixitais, a voz sintética, a interacción e conversa mediante a voz con dispositivos, IoT e demais.
Para Trasno trátase dun proxecto novidoso e creo que somos a mellor opción dentro do mundo dos Guls para sacalo adiante porque somos os que tratamos coa lingua máis a fondo. Para poder lanzar o proxecto Common Voice de Mozilla, necesítase recoller como mínimo unhas 5000 frases en texto. A interface web do sistema xa está traducida pero necesítase andar varias fases máis antes de sacalo ao público. Ese repertorio de frases escritas é o que deben ler en voz alta os participantes para rexistrar a súa voz. Con esas voces adéstrase o sistema de intelixencia artificial que debe interpretar a fala da persoa. Son moitas Creo que será conveniente recollelas nunha folla de cálculo, antes de entregalas ao proxecto porque aínda non teño claro o procedemento nin a interface que utilizar e sempre será conveniente que fagamos unha autorevisión para que cumpran as normas, sobre todo ortográficas e de puntuación. Pídovos que vaiades facendo a vosa lista; de cada un trasnego unhas 100, polo menos. É moi importante que a fonte da frase sexa absolutamente libre (non valen da Wikipedia) e que se cedan ao dominio público. É importante que sexan en estilo coloquial ou neutral (non académico, nin artístico) É recomendable que teñan sentido para que ao lelas en voz alta, os voluntarios poidan darlle a entoación adecuada. Como se busca a variedade de acentos é conveniente que traten sobre temas da vida corrente, onde resulta máis doado ser natural. De aquí a uns días, podo concretar máis. Mentres tanto, se tedes algo que achegar ou ideas ou ofertas concretas de colaboración, etc. pois este é o mellor momento. Antón Méixome - Lista de correo de Proxecto Trasno - Enviar correo a - proxecto@trasno.gal - Administrador - administra...@trasno.gal - de - Proxecto Trasno - Cancelar a subscrición no URL : http://trasno.gal/web?confirm_unsubscribe=indeed&m=5046&h=2420f2c18a0a8e5903cb975ead69cff1496d18f0&sa=317506914
